CAGAYAN DE ORO CITY- Napasaka na ang kasong pagpabaliya ug paghupot sa gidiling droga batok sa municipal councilor nga unang nasikop diha sa Brgy Mantangale,Balingoan,Misamis Oriental.
Miingon si PDEA agent Ben Calibre nga nangayo’g preliminary investigation ang suspek nga si Kag Roel Padillo hinungdan nga wala matiwas ang pagduso sa kaso sa piskalya ning syudad kagahapong adlawa.
Gisalig na lamang usab ni Calibre sa Ginoo ang ilang kaluwasan dihang nagbahad si Padillo nga daw ipa-barang niini ang taga-PDEA nga misikop kaniya.
Si Padillo ang mihimakak nga nakuhaa’g 30 gramos nga gitoohang shabu dihang gi-serve ang search warrants batok kaniya sa miaging semana.
