CAGAYAN DE ORO CITY – Namiligro nga mag-atubang sa kasong administratibo ug kriminal si City Mayor Rolando ‘Klarex’ Uy ingon man ang nangulo sa J.R Borja City Hospital nga si Dr. Ferdie Miranda ning syudad.
Kini kon si kanhi City Mayor Oscar Moreno ang pasultihon nunot sa giingong kasupakan sa duruha sa balaod nga dili una motudlo’g former political candidate alang sa posisyon sulod sa usa ka tuig gikan sa milabay’ng 2022 elections.
Miingon si Moreno nga kon dunay mga magbubuhis nga intresado nga mo-kuwestiyon sa katudluan ni Miranda,hayan mag-atubang kini kuyog si Uy sa kasong pagsupak sa graft and corrupt practices act sa Ombudsman ingon man criminal offense sa Sandiganbayan.
Samtang wala nagpa-apekto sa ilang pokus sa trabaho si Uy kuyog ang iyang city hall managers batok sa mga paghinaway gikan sa kanhi administrasyon sa dakbayan.
Kini human ipasigarbo ni Uy nga naglambo pa ang mga batakang serbisyo nga natunol sa city hospital ngadto sa katawhan sa syudad.
Siya miingon nga gitahasan niya si Miranda nga tumbukon pa mga kakulangon sa maong tambalanan aron pangitaa’g sulbad sa city govt.
Hisayrang nag-level 2 na ang maong ospital rason nga nagdagsa na pag-ayo ang katawhan nga gadangop niini bisan kadtong mga arangan alang sa ilang pangihanglang medikal.
