CAGAYAN DE ORO CITY – Gikuwestiyon sa pipila ka sakop sa konseho kon nganong mas giuna pa ang pagtukod sa duha ka extension hospital sa Brgy Lumbia ug Brgy Tablon apan daghan pa ang kakulagon sa mismong city hospital ning syudad.
Nahimugso kini nga isyu tungod sa special report ni Kag James Judith diin ubay-ubay’ng mga pasyente ang nangamatay kay dugay maatiman sa mga doktor sa maong ospital.
Miingon si Judith nga labing maayo kon gigasto sa pagpalit sa mga ekipo aron mahimong level 2 ang city hospital kaysa motukod sa dugang balay-tambalanan nga labaw la’g gamay sa brgy health center ang miaging administrasyon.
Samtang gisupak ni health committee chairperson Kagawad Malou Gaane ang mga pasangil ni Kag James Judith kabahin sa daw luya nga serbisyo sa mga doktor ug medical staff sa city hospital ning syudad.
Miingon si Gaane nga mahimong dunay pipila ka kakulangon apan angayang dili basulon ang mga doktor ug nurses kay naningkamot sila pag-atiman sa daghang pasyente nga gadagsa sa maong ospital.
Hinoon,giangkon sa konsehal nga ning tuiga pa subli iduso sa city govt ang mga rekisito aron mahimong level 2 ang JRBH.
