CAGAYAN DE ORO CITY – Gikasuhan na sa kapolisan ang kawani sa City Hall nga ilang nadakpan tungod sa pagbaligya sa ginadiling druga.
Maoy gikasuhan sa pagsupak sa RA-9165 ang suspek nga si Candido Echalico alyas Pigoy, 51 anyos, minyo, taga Brgy Carmen ning syudad ug kawani sa City General Services Office.
Nasikop si Echalico pinaagi sa drug buy bust operations nga gilusad sa hiniusang pwersa sa Bulua Police Station ug Regional Special Operations Group o RSOG-10 diha sa Gaston Park duol lamang sa City Hall.
Miingon si Police Capt. Jason Sto. Domingo, hepe sa Bulua PNP nga ilang nakuha gikan kang Echalico ang duha ka sachets sa drugang shabu nga nagbalor sa 5-mil pesos.
Dugay na matud pang gapamaligya sa ginadiling druga ang suspek, apan kagahapon lamang kini nasikop sa kapolisan.
