CAGAYAN DE ORO CITY – Hugot gikondinar sa Kapisanan ng mga Broadcaster ng Pilipinas o KBP-Cagayan de Oro-Misamis Oriental Chapter ang pagpatay sa radio anchor sa Kidapawan City, North Cotabato.
Gitawag ni KBP-Cagayan de Oro-Misamis Oriental Chapter president Tito Monterde nga ‘barbaric act’ ang pagpatay kang Eduardo “Ed” Dizon kinsa anchorman sa 97.5 Brigada News FM Kidapawan.
Sakay sa iyang sakyanan si Dizon ug pauli na sa ilang panimalay sa dihang gibanhigan kini sa riding in tandem.
Nakaangkon kini sa lima ka samad pinusilan sa lawas nga nagresulta sa iyang hinanaling kamatayon.
Nagtoo si Monterde nga may kalabutan sa pagtuki ni Dizon sa mainit nga isyo sa KAPA Ministry International Incorporated ang pagpatay kaniya apan gisuta pa kini sa kapolisan.
Tungod niini, miapelar si Monterde sa PNP nga hatagan seguridad ang mga sakop sa prensa nga mituki sa mga mainit nga isyo sama sa investment scam sa KAPA.
Una niini, girapido usab ang simbyahan sa Bombo Radyo sa General Santos City tungod sa walay hunong pagtuki sa kahanginan sa ilegal nga kalihukan sa KAPA.
