CAGAYAN DE ORO CITY – Gi-konsidera nga ‘case closed’ na sa legal team ni Carmen Punong Brgy Kikang Uy ang giatubang niini nga motu propio nga kaso sa Commission on Elections diin siya gipa-disqualify pagdagan pagka-kongresista sa distrito uno sa syudad.
Kini human pabori sa Comelec 2nd Division ang hangyo sa mismo nila nga law department nga isibog una ang maong kaso batok KapKik.
Miingon si Atty Angie Carrasco-Geñeso,abogado ni Kikang nga hinaut nga wala na’y harassment nga mahitabo ug tugtan ang katawhan nga mopili sa angay kandidato sa premiero distrito.
Una nang namugos ang panig ni Uy nga walay igong basehan ang pasangil nga mihimo kini’g maniobra sa pagpasulod sa flying voters sa Brgy Carmen aron makadugang sa iyang mga boto sunod eleksyon.
Hisayrang ikasangka’g balik ni Kikang si incumbent Cagayan de Oro 1st District Cong. Lordan Suan sa 2025 elections.
