CAGAYAN DE ORO CITY – Wala hunungi sa lower unit operatives sa Philippine National Police ang paggukod sa mga sindikato nga nalambigit sa cigarettes smuggling activities sa pipila ka bahin sa rehiyon sa Mindanao.
Kini human itug-an sa Bureau of Customs o BoC nga anaa sa 25 bilyones pesos ang lugi sa gobierno epekto sa kalihukang pagpang-ismagol.
Gitumbok ni PNP chief General Rommel Francisco Marbil ang laing operasyon sa Picong Municipal Polie Station diin nasapon nila ang abandonadong sakyang pandagat nga dunay mga sakay nga sigarilyo sa lapyahan sa Sitio Talub,Barangay Liangan sa lungsod sa Picong,Lanao del Sur.
Namahayag ang heneral nga subay sa gitaho sa Police Regional Office -Lanao del Sur nga anaa sa napulo ka kahon sa mga sigarilyo nga nagkantidad 110-mil pesos ang nakompiskar sa maong operasyon.
Nakuptan na sa BoC ang maong mga sigarilyo aron magamit nga ebedensiya batok sa mga utok nga dakponon pa sa mga otoridad epekto sa maong kalihukan sa lugar.
