CAGAYAN DE ORO CITY – Gimando ni City Mayor Rolando ‘Klarex’ Uy ang paghatag proteksyon sa kinaiyahan sa dakbayan agi’g pagtubag sa sugo sa nasudnong kagamhanan.

Kini ang rason nga pasado na ang ordinansa nga nagtugot sa city govt nga makiglambigit sa kasabutan sa ubang mga ahensiya sa gobierno aron ipa-aktibo ang Task Force Kinaiyahan.

Miingon si DILG City Director Edward Bhagwani nga dako kini’g matabang dili lang sa katawhan sa dakbayan sa ubang bahin sa rehiyon.

Siya miingon nga unta magsilbing dakong leksyon kon unsa man ang nahatag nga kadaot nga dala sa bagyong Sendong diin sobra libo ka tawo ang namatay dihang mihapak kini niadtong Disyembre 2011 sa syudad.

Hisayrang kabahin sa nag-unang suliran sa kahimtang sa bukiran sa syudad ang pipila ka illegal mining operations nga dako’g epekto sa kayutaan ug pagka-damyos sa suba sa Iponan.