CAGAYAN DE ORO CITY – Dili magpanuko’g paghawa sa katungdanan pagka-mayor si Rolando ‘Klarex’ Uy kung adunay makapamatuod nga may ghost projects kini ubos sa iyang sobra tulo ka tuig nga pagdumala sa dakbayan.
Kini ang direktang tubag sa mayor batok sa pasangil nga nagsilbing ‘ghost project’ ang wala natibawas ang halos P65 milyon pesos nga mega health center nga sobra duha ka tuig nang nagbarog sa Sitio Macanhan,Brgy Carmen ning syudad.
Siya miingon nga walay obligasyon ang city government ngadto sa nagtrabahong kontraktor sa proyekto.
Gani, gipa-terminate na sa city govt ang pirmadong kontrata tali sa Nurben Engineering and Building Construction kay sumala pa kulang sa kaikag sa pag-trabaho sa maong proyekto.
Subli namugos ang mayor nga gibiyaan sa kontraktor ang proyekto rason nga nagpabiling steel structures lang ang anaa sa lokasyon.
Pagpasabot ni Uy nga dili niya ihikaw ang iyang katungdanan ug diretsong mokanaug sa puwesto kung tinud-anay nga ‘ghost project’ ang maong isyu nga naabot na sa nasudnong atensyon.
Taliwala niini, paningkamutan sa administrasyon nga tiwason ang proyekto kay gitukod man kini alang sa dugang pag-alagad sa katawhan.
Dumduman nga milabay’ng mga adlaw, mitingog ang tag-iya sa Nurben Construction nga si Engr Benjamin Hamid ug namugos nga wala nila biyahe ang proyekto.
Napugos lang daw hinoon sila sa paghunong sa trabaho kay pakyas ang city hall sa pagbayad sa ilang trabaho haom sa pirmadong kasabutan.
Sa impormasyon gilugwa ni Hamid nga gisugdan nila ang proyekto pagtrabaho Marso 2024 haom sa nadawat nila nga 15 porsiento nga mobilization fund.
Apan nagsugod ang problema kay giingong napakyas ang city govt pagbayad sa ikaduhang project billing hinungdan gipaubos sa kontraktor sa work suspension ang trabaho.
Kini ang rason nga nagkasumpaki ang pagpasabot ni Klarex ug Hamid sa maong isyu.
Hisayrang gitinguha unta mahuman ang maong proyekto niadtong Enero 2025 apan subling ipaubos sa project bidding ning bahina sa tuig gumikan sa nasugatan nga kasilik-an.
