CAGAYAN DE ORO CITY – Miduso na sa iyang kandidatura pagka-mayor si 1st District Congressman Rolando ‘Klarex’ Uy ug 1st District City Councilor Edna ‘Inday’ Dahino pagka-bise mayor sa One CdeO- One MisOr Team diha sa City Comelec sa Brgy 7 ning syudad.
Kini nunot sa pagtugot sa Comelec nga makaduso na sa ilang kandidatura ang mga kandidato nga molambigit saa 2022 elections.
Miingon si City Election Officer Atty Ramil Acol nga gawas kang Dahino,gitahasan lamang ni Klarex ang sinaligan niini nga si Shiela Lumbatan nga maoy moduso sa iyang CoC.
Dugang ni Acol nga miduso usab pagka-mayor nga kandidato ang negosyante nga si Vicente Flores nga taga-Brgy Gusa ning syudad.
Samtang misang-at usab sa iyang CoC pagka-independent kagawad sa segundo distrito sa syudad ang media practitioner nga si Domer Postero.
Si Klarex kinsa ang 3rd termer na nga kongresista ang gitakdang atbangan sa mga kandidato sa alyansa sa Padayon Pilipino-Centrist Democratic Party-Bag-ong Cagayan nga panguluhan nila ni Phividec administrator Jose Gabriel ‘Pompee’ La Viña isip mayor ug Konsehal Jocelyn Rodriguez pagka-bise mayor.
