CAGAYAN DE ORO CITY – Mismo na si Gusa Brgy Kap Marlo Tabac ang mi-absuwelto kang City Mayor Klarex Uy nga hayan adunay kalabutan sa pugsanon ug illegal nga pagpapha kaniya isip bise-presidente sa Liga ng Kapintanes-Cagayan de Oro chapter niadtong 5 sa Hunyo ning tuiga.
Kini human unang nasampit kaniadto ni outgoing Association of Brgy Councils o ABC president ug incoming City Councilor Alam Lim nga gibuhat nila ang pagpapha kang Tabac tungod sa presyur gikan sa mayor ug grupo ni Kongresista Rufus Rodriguez.
Miingon si Tabac nga dili angayang apil-apilon ug gamiton sa mga kapitanes nga adunay hinakog nga katuyuan ang maong mga personalidad kay sa katapusan molugwa lang gihapon ang kamatuoran.
Gisaway ni Tabac ang daw ‘grandstanding ni Alam atubangan sa katapusang nila nga city council session diin nag-aghat nga siya imbestigaran tungod sa pipila ka giingong anomaliya sulod sa ABC ug mismo sa Brgy Gusa.
