CAGAYAN DE ORO CITY – Angayang hiniusang batukan sa katawhan sa kasamtangang panahon ang paspas pagkaylap sa mga impormasyon nga moguga sa bililhon kahulugan sa adlaw sa kaugalingnan sa nasud.
Kini ang kabahin ni City Mayor Rolando ‘Klarex’ Uy nunot sa pagpangulo sa pagpakayab sa nasudnong bandila sa ika-126 ka tuig nga adlaw sa kaugalingnan sa Pilipinas sa Plaza Divisoria ning syudad kaganihang buntag.
Miingon si Uy nga dili mahimong motigbabaw ang pagsabwag sa mga bakak nga mga impormasyon gamit ang prensa aron matabunan ang sakripisyo ug diwa sa pagbuhis kinabuhi sa unang mga Pilipinhon ilabina kadtong naggikan mismo dinhi sa dakbayan.
Hisayrang human ang pagpakayab sa dakong bandilang Pilipinhon,gihalaran usab sa mga bulak ug gihatagan sa pagyukbo ang monumento diin nakapahimutang ang mga bukog sa mga Kagay-anons ug Misamisnon nga kabahin sa nakig-away sa langyaw’ng puwersa nga nahiabot dinhi sa dakbayan.
