CAGAYAN DE ORO CITY – Dili kumbinsido si City Mayor Rolando ‘Klarex’ Uy sa napakitang performance sa interim officials nga mga tinudlo sa Local Water Utilities Administration o LWUA aron sulbaron ang daghang suliran sa Cagayan de Oro Water District o COWD ning syudad.
Kini ang reaksyon sa mayor nunot sa dugang tulo ka bulan nga lugway sa interim board of directors ug mngt kay wala pa mahuman ang ilang tahas nga gisangon ni Pres Bongbong Marcos.
Miingon si Uy nga wala pa usab pa kini makakita sa opisyal nga kopya sa LWUA nga naglugway sa trabaho sa interim BODs rason nga dili una siya motoo niini.
Dugtong usab niini,gitakdang makigtagbo ang kadagkuan sa Metro Pacific-COBI sa interim officials sa COWD.
Kini aron hisgutan kon unsaon nga mabayran na sila sa sobra 6 milyones pesos nga obligasyon sa COWD nga pakyas pa gihapon makuha sukad sa pagbuto sa isyu.
Miingon si Atty Roberto ‘Bob’ Rodrigo,senior legal counsel sa kompanyang MetroPac nga nagduso na usab sila’g arbitration case sa Singapore isip pagsunod sa sugod sa kontrata kon magbaton sa problema ang transaction sa COWD ug COBI.
Hisayrang gisupak sa regular COWD BODs ang otomatikong usbaw sa bayrunon sa tubig kada-tulo ka tuig sulod sa maong kontrata.
