CAGAYAN DE ORO CITY – Gidawat ug gipasalamatan ni City Mayor Rolando ‘Klarex’ Uy ang pag-takeover sa Local Water Utilities Administration o LWUA officials sa tanang operasyon sa city water district ning syudad.
Kini sukwahi sa pagdumili’g ila sa kasamtangang COWD board of directors sa pagsulod sa interim officials nga dunay pagtugot kang Pres Bongbong Marcos.
Namahayag si Janboy Actub, bag-ong tigpamaba ni Uy nga sa pag-courtesy call sa LWUA officials sa city hall kagahapon,sila gihangyo nga masiguro nga dili na putla’g tubig ang syudad.
Gipasabot ni Uy niini ang sobra usa ka adlaw nga pagputol sa Cagayan de Oro Bulk Water Incorporated Incorporated sa suplay gikan sa Rio Verde padulong sa COWD pipelines.
Apil usab sa gustong mahitabo ni Uy nga mawagtang na ang probisyon sa kontrata nga kada-tulo ka tuig,otomatikong dunay usbaw sa bayrunon sa tubig.
Dumduman nga wala pa kini midako ang isyu,una nang namahayag si Uy nga dili unta niya gusto manginlabot ang LWUA kay alang kaniya wala na’y kontrol sa mahitabong presyuhan sa tubig.
Apan sa pagduaw usab ni Marcos sa syudad diin siya ang miabi-abi niini namahayag nga gusto niya masulbad ang isyu sa panubig rason gitahasan ang LWUA paghimo’g aksyon.
