CAGAYAN DE ORO CITY – Nalipay ug init nga gidawat sa city government sa Cagayan de Oro ang Catholic Bishops Conference of the Philippines o CBCP nga pagpili isip lokasyon alang sa ilang ika-128 nga plenary assembly ning semanaha.
Kini ang giluwatang pahayag ni City Mayor Rolando ‘Klarex’ Uy alayon sa hukom sa CBCP nga dinhi sila magtagbo sa dakbayan taliwala sa daghang mga lugar sa Mindanao nga angay pa unta nga mahatagan kahigayunan.
Namahayag ang mayor nga dakong garbo alang sa katawhan sa dakbayan nga makatiaman sa 90 ka obispo sa simbahang Katoliko ingon man sa duha ka opisyal nga representasyon ni Pope Francis gikan sa Vaticano.
Gawas sa maayo nga akomodasyon ug hugot nga seguridad alang sa CBCP plenary assembly delegates, dalitan usab sa panihapon sa city government ang mga bisita sa higayon nga mahidangat na sila gikan sa ilang pila ka adlaw nga retreat sa Transfiguracion Abbey sa Malaybalay City,Bukidnon sugod ning adlawa.
Hisayrang pagpili sa Mindanao nga magsilbing lokasyon sa ika-128 nga CBCP plenary assembly ang tubag sa hagit ni Pope Francis nga angayang mogawas sa ilang komportableng kinabuhi ang mga kaparian ug adtuan ang mga lugar nga nagkinahanglan pag-ayo sa pag-amuma’g pag-atiman.
