CAGAYAN DE ORO CITY – Dili maka-apekto sa panarbaho ni Padayon Pilipino party chairman ug Cagayan de Oro 1st District Congressman Lordan Suan bisan kon napalig-on na ang puwersa ni City Mayor Rolando ‘Klarex’ Uy pinaagi sa pagkuyog na pamilyan ni Cagayan de Oro 2nd District Rep. Rufus Rodriguez alang sa umaabot 2025 elections.
Kini ang pagpasabot ni Suan nunot sa pangutana kon unsay buhaton sa ilang partido sa paghiusa sa dagkong mga pamilya sa politiko nga dayag nangandam na sa piliay sunod tuig.
Siya miingon nga walay mahatag nga kausaban ang Klarex-Rufus unification kay dili kini apil sa iyang mando isip kongresista sa unang distrito sa dakbayan.
Si Suan ug Rufus ang kuyog sa alyansang-politika batok sa grupo ni Uy sa miaging 2022 election apan tungod sa maayong relasyon tali sa city council ubos ni City Vice Mayor Jocelyn Rodriguez, naporma ang bag-ong panaghiusa.
Gani, sa miaging 2023 Barangay ug SK elections pulos wala butangi’g kontrata kandidato ni Klarex ug Rufus ang isigka-barangay niini sa Carmen ug Nazareth.
Nagkahulugan nga nagsilbing ‘easy win’ alang sa anak ni Rufus nga si Atty Regine Rodriguez ang pagka-barangay kapitan sa Nazareth ug napa-pokus usab pagpildi si Kikang Uy sa amahan ni Suan nga si Agapito ‘Jun’ Suan Jr.
Dugang ni Suan nga maka-pokus una kini sa trabaho kay wala pa nila mahisguti sa partido ang Klarex-Rufus alliance.
Una nang gibutyag ni Suan nga bukas kini sa pakig-alyansa kang kanhi City Mayor Oscar Moreno,kanhi Phividec administrator Jose Gabriel ‘Pompee’ La Viña o si incumbent Phividec administrator Joseph Bernedo.
