CAGAYAN DE ORO CITY – Wala makiglantugi si City Mayor Rolando ‘Klarex’ Uy sa kalantip ug kahanas sa salabutan ni kanhi mayor Atty.Oscar Moreno.
Kini ang tubag sa mayor nunot sa pagsaway ni Moreno nga ‘imagine emergency’ ang gihimo sa city government pag-abot sa isyu sa panubig sa dakbayan.
Miingon si Uy nga mubo ra ug dili tingali siya kaapas sa pangutok ni Moreno apan iyang gipaniguro nga masilbihan ang katawhan ug wala talikdi pag-abot sa hulga sa panubig.
Siya miingon nga mag-unsa ang ka-maalamon sa kanhi mayor kon pakyas usab kini pagtubag batok sa pagmentaha nga nadiskobrehan sa kontrata tali Cagayan de Oro Water District ug Cagayan de Oro Bulk Water Incorporated o COWD-COBI.
Namugos ang mayor nga kon nagtarong pa si Moreno sa pag-atubang sa maong problema kaniadto, dili mag-atubang sa grabeng kahasol ang katawhan.
Dugang ni Uy nga kon wala pa tagu-i sa kanhi hunta direktiba sa COWD ang kontrata kalikayan ang gisagubang nga sitwasyon sa dakbayan.
Gitudlo ni Klarex nga dunay dakong kalambigitan ug kasayuran si Moreno sa joint venture ug bulk water contracts nga gisudlan sa COWD ug COBI.
Samtang giingong dili na angay molayo sa isyu si Uy.
Kini ang tubag usab ni Moreno nag-unang tuyo ni Klarex nga pagguba kaniya ug pagpalayas sa COBI dinhi sa dakbayan.
Miingon ang kanhi mayor nga giduot siya sa city hall aron basulon sa katawhan ug kasuk-an ang COBI aron mapasayon ang direktibang pag-suplay na sa tubig sa Rio Verde Water Consortium sa COWD.
Pamatood sa motibo sa city hall ang paggamit sa city council aron e-deklara nga persona non grata ang MetroPac sa pamasin nga mohawa kini sa dakbayan.
Dugang ni Moreno nga kon nagpadala pa ang MetroPac sa taktika sa city hall,hayan may natigayon na nga water purchase order ang COWD ngadto sa Rio Verde nga tipik sa mga plano sa grupo ni Klarex.
Nakasaway usab kini sa konseho kay nagpagamit sa interes sa city hall pinaagi sa pagpalabang sa resolusyon nga persona non grata declaration batok MetroPac-COBI.
Dumduman nga daghan ang dismayado sa simple nga contract conflict payable dispute sa COWD ug COBI kay gisakyan sa kagaw sa politika.
