CAGAYAN DE ORO CITY – Gihimong kataw-anan ug nanginsulto sa Commission on Elections o Comelec ang gidason nga disqualification cases batok kang City Mayor Rolando ‘Klarex’ Uy ug Carmen Punong Brgy Kikang Uy.
Kini ang gipalanog nga reaksyon ni Mayor Klarex pinaagi sa iyang tigpamaba nga si Janboy Actub nunot sa tinguha ni city vice mayoralty candidate Zaldy Ocon nga ma-disqualify ang mag-amahan sa May 12 elections sa syudad.
Kini tungod sa isyu sa kuwestiyonable nga pagsaka sa ihap sa mga bag-ong botante nga midasmag sa Brgy Carmen sa miaging tuig.
Miingon si Actub nga sobra na ngil-ad ug alsa sa kaugalingong bangko ang gihimo ni Ocon nga siya usa ka kandidato nga nakig-atbang sa administrasyon apan mismo ra usab kini ang nagduso’g kaso batok Klarex ug Kikang sa Comelec-Manila.
Hisayrang ang maong isyu ang inisyal nang giatras sa Comelec-Law Dept kay kulang ang ilang mga ebedensiya sa miaging Disyembre 2024.
