CAGAYAN DE ORO CITY – Gibasol ni City Mayor Rolando ‘Klarex’ Uy si 1st District Cong. Lordan Suan ang nasinatian nga grabeng trapiko sa mga sakyanan sa Macapagal Drive padulong sa Brgy Canitoan ning syudad.
Kini tungod sa giingong walay koordinasyon ni Suan sa city hall sa pagpatuman sa road projects niini sa distrito uno.
Namahayag ang mayor nga tungod sa pag-bypass ni Suan nga makig-koordinar sa city govt,nahasol ang katawhan nga gasulod-gawas sa gitrabaho nga re-blocking sa duha ka lanes sa brgy road sa nahisgutang lugar nga dunay gahin sobra 4 milyones pesos.
Samtang dili iya ni Suan apan gipanag-iya sa city govt ang kasamtangang gitrabaho nga road re-blocking project nga nagkutay sa Macapagal Drive lahos sa Brgy Canitoan sa dakbayan.
Kini ang tubag ni Suan sa pagbasol ni Uy kaniya nga nakahatag sa grabeng trapiko ang nahisgutang proyekto.
Namahayag ang kongresista nga ‘drainage project’ lang iyang napatuman sa nahisgutang bahin sa lugar.
Gihimakak usab niini nga walay koordinasyon sa city govt kay dili masugdan ang proyekto kon walay pagtugot sa hingtungdang mga ahensya sa dakbayan.
