CAGAYAN DE ORO CITY – Gi-depensa ni City Mayor Klarex Uy kon nganong nakighiusa na kini sa iyang politika ngadto kang Cagayan de Oro 2nd District Cong. Rufus Rodriguez.
Kini bisan kon gilikayan una ni Rodriguez ang iyang paghatag komento sa katarungan nga sayo pa aron hisgutan ang ilang mga politikanhong interes sa umaabot piliay sa dakbayan.
Miingon si Uy nga labing maayo nga modangop kini sa mas klaro nga kaila ug alyado sa politika kaysa tawo nga igo lang migamit kaniya sa taas nga katuigan.
Sa labing ulahi nga alyado ni Klarex sa iyang politika si kanhi City Mayor Oscar Moreno ayha miaslom ang ilang relasyon.
Samtang wala mag-interes si Moreno kon kinsa man ang gipasilungan ni Uy alang sa dugang ambisyon niini sa politika sa dakbayan.
Miingon si Moreno nga angayang ipangutana ni Klarex kon tinud-anay ba gyud nga mibilib sa iyang kapas isip mayor sa dakbayan si Cagayan de Oro 2nd District Cong. Rufus Rodriguez.
Miingon usab si Moreno nga natagam na sa hisgutanan sa mga alyansa sa politika kay may gitabangan siya apan nagka-amnesia dihang nakalingkod na sa katungdanan sa syudad.
