CAGAYAN DE ORO CITY – Pabor si City Mayor Rolando ‘Klarex’ Uy nga ipahigayon ang brgy ug SK elections ning tuiga.Kini kon modako man lamang magasto sa maong piliay kon isibog sa Mayo o Disyembre 2023.
Reaksyon kini sa mayor sa argumento nga dili magasto ang 8 bilyones pesos nga alokasyon ning tuiga apan mahimong 18 bilyones pesos usab pag-abot sa sunod tuig ang piliay.
Siya miingon nga anaa sa kongreso ug kang Pres Bongbong Marcos ang gahom kon angay ba ang madayon o masibog ang piliay sa brgy ning tuiga.
Bisan sa hugon-hugon nga isibog ang pang-brgy nga piliay,apan gilugwa n sa Comelec ang mga petsa kon kanus-a mahimong makaduso sa sertipiko de kandidatura ang mga indibidwal nga modagan sa nagkadaiyang position ning tuiga.
Si Klarex ang nagsugod sa pagka-konsehal,kapitan sa brgy ayha napili sa tulo ka termino sa pagka-kongresista sa unang distrito ayha nahatagan sa higayon magsilbing bag-ong mayor dinhi sa dakbayan.
Samtang mas gustuhon ni Misamis Oriental 2nd District Cong. Bambi Emano nga i-usa ang pagpili gikan sa nasudnong posisyon padulong sa barangay palibot sa nasud.
Kini sa tuyo nga likayan ang dako nga galastuhan ug ang pagguba sa maayong relasyon sa pipila ka pamilya ug mga higala gumikan lamang sa politika.
Miingon si Emano nga personal usab siya nga uyon nga masibog na lamang una sa sunod tuig ang brgy ug SK elections aron mapondohan ang mga prioridad nga programa sa kagamhanan.
Si Emano ang kanhi mayor Tagoloan,duha ka termino pagka-kongresista ug siyam ka tuig pagka-gobernador ug subli nagbalik kongreso aron representahan ang segundo distrito sa Misamis Oriental.
