Gi-awhag sa Transport Group nga ‘Manibela’ ang gobyerno nga paspason ang pagpatuman sa klaro ug konkreto nga mga lakang aron maibsan ang epekto sa padayon nga pagsaka sa presyo sa lana, nga giangot sa kagubot sa Middle East.
Sumala ni Manibela Chairman Mar Valbuena, bisan pa nga adunay mga lakang nga gihimo ang gobyerno, dili kini igo tungod sa sunod‑sunod ug paspas nga pagtaas sa presyo sa lana sa miaging mga adlaw.
Nanawagan siya sa Department of Transportation (DOTr) ug Land Transportation Franchising ang Regulatory Board (LTFRB) nga ipagawas dayon ang fuel subsidy alang sa mga Public Utility Vehicle (PUV) Drivers aron matabangan sa ilang gasto sa krudo.
Dugang pa niini, gihangyo usab ni Valbuena ang Kongreso nga hatagan sa gahum ang Presidente sa pag‑suspende sa fuel excise tax isip dali nga lakang aron mapamenos ang presyo sa lana sa nasud. (by Phillip Ariata)
