Gimando ni Lapasan Punong Barangay Julito Ogsimer ang pagpahunong sa klase kagahapong adlawa sa Lapasan National High School aron malikayan ang giatubang nga bahad sa seguridad gikan sa Grade 7 hangtod Grade 12.
Gipadayag sa maong opisyal nga dili gayud angay balewalaon ang bisan unsang matang sa pagpambahad kay kinabuhi man sa mga inosenteng kabatan-onan ug magtutudlo ang nakatarog sa peligro.
Human nakadawat og mga taho bahin sa planong pag-atake nga naglakip usab sa uban pang mga tunghaan, gilayon nga gipatuman ang maong lakang alang sa kahimtang sa tanan.
Dugang pa ni Ogsimer, kinahanglan nga sigurohon ang pagpanalipod pinaagi sa preventive suspension tungod kay mas maayo nga mangandam nang daan kaysa magbasol sa ulahi.
