CAGAYAN DE ORO CITY-Gihagit sa Kilusang Mayo Uno o KMU-Northern Mindanao ang inspectors sa Department of Labor and Employment o DoLE-10 nga ipatuman gilayon ang end of contractualization o endo.
Kini human pirmahi ni Pres Rodrigo Duterte ang executive order batok endo.
Si KMU Northern Mindanao Secretary General Wildon Barros miingon nga manghinaut sila nga seryosohon sa DoLE ang pagpatuman sa kamanduan ni Pres Duterte ilabina ang pagpahunong sa labor-only contracting.
Una nang giakusahan sa KMU nga tungod sa inspectors nga gadawat sa suhol ang hinungdan kon nganong pabiling nag-operate ang mga kompaniya nga nakasupak sa labor code.
Samtang gidayeg ni Cagayan de Oro City Police Office o COCPO spokesperson Supt Mardi Hortillosa ang nagmalinawon nga parada-protesta sa mga mamumuo sa kasaulugan sa Labor Day ning adlawa.
Si Hortillosa miingon nga iyang gilibot ang tanang mga lugar kon asa gipahigayon ang mga protesta.
Una niini, nakaalerto ang kapolisan ug militar sa pagseguro nga magmalinawon ang pagpahigayon sa mga labor day protests karong adlawa.
Gihatagan usab sa igong seguridad sa mga pulis ang mega job fairs nga gipahigayon sa DOLE kuyog ang kapin gatos ka kompanya sa Limketkai Mall ning syudad.
