CAGAYAN DE ORO CITY – Wala ikaulaw ni Olympian boxing silver medalist Carlo Paalam nga siya nakatilaw sa pinakaunang knockdown sa iyang amateur career nga nasaksihan sa daghang fans sa kalibutan.
Kini human siya tumbaha ni Great Britain boxer Galal Yafai sa ilang Tokyo Olympics final match sulod pa lamang sa round didto sa Japan.
Miingon si Carlo nga may plano na unta kini nga dad-on ang dula sa tunga-tunga sa boxing ring ug dili magpa-corner apan mas naunhan siya sa lihok ni Yafai hinungdan nga natumba.
Apan alang Paalam nga mas nakadugang sa iyang kasinatian ang nahitabo kaniya aron maantigo na nga mo-adjust sa mga sunod nga away ilabina sa 2024 Paris Olympics sa Pransya.
Namahayag pa kini nga walay angay ikabalaka ug ikadismaya kon siya na knockdown kay kabahin sa kanunay sa dula ang dunay matumba o ma-knockout.
Sa maong dula,kon wala pa matumba si Carlo,siya unta ang ilhon nga boxing gold medalist kay naka-rekober kini sa duha ka rounds batok Galal.
Si Paalam ang nagbakasyon una dinhi sa syudad samtang mopaubos sa minor shoulder operation tungod sa injury nga nakuha niini sa pakig-away sa Japanese boxer nga si Ryomie Tanaka.
