CAGAYAN DE ORO CITY, Philippines – Pormal nang gi-withdraw sa 6milyon ka miyembro sa Kingdom of Jesus Christ (KOJC) Church ang ilang suporta kang Presidente Bongbong Marcos.
Kagahapon, milusad sa lapad nga lihok protesta ang ilang church members aron ikondinar ang daghang kalapasan sa tawhanong katungod sa grupo ni PRO-11 Chief Nicholas Torre III, dihang ilang puwersadong gilusob ang ilang compound, sa milabay’ng adlaw .
Tumong usab sa lihok protesta ang pagpalanog nga mubiya na sila sa pagsuporta sa Pamilya Marcos ug sa iyang partido. Nunot kini sa mihungaw nga report nga si Marcos ang utok sa puwersadong pagpadakop kang Quiboloy.
Sa live telecast sa Sonshine Media, mi-ingon si Lorraine Badoy, usa sa ilang news commentary anchor nga kompirmado nga si Marcos ang nagmando kang Torre aron lusubon ang compound.
Gani, gikondinar ni Badoy ang paggamit sa teargas sa kampo ni Torre human nagtuo nga nagtago sa dagkung imburnal ang amahan sa simbahan sa KOJC.
Si Badoy nakatilaw usab sa pagkapriso sa Batasang Complex, panahon sa administrasyon ni Marcos Jr, tungod sa ilang kalambigitan sa pagpakaulaw kang House Speaker Martin Romualdez nga nanghatag sa salapi sa mga kaubang magbabalaod aron makalusot ang Peoples Initiative sa pagbag-o sa sistema sa pangagamhanan sa nasud, gikan sa demokrasya padulong sa sistemang Pederal.
Hinoon, wala milampos ang pundok ni Romualdez, kinsa ig-agaw ni Marcos human gibaraw kini sa pipila ka mga magbabalaod sa senado.
