CAGAYAN DE ORO CITY – Gitahasan ni City Vice Mayor Rainer ‘Kikang’ Uy si City Councilor Atty Edgar Cabanlas nga panguluhan ang committee of the whole aron imbestigaran ang ilang kauban nga si SK Federation President Kag Michael John Seno ning syudad.
Kini human unang nagpabati dinhi sa Bombo Radyo sa reklamo ang 21 anyos nga babaye nga si alyas Ivy nga mag-hook up sila ni Seno sa miaging Marso 26 sa kadlawon.
Miingon si Uy nga nauyunan kini sa mayoriya sa tuyo nga masuta ang kamatuoran ug malimpyuhan usab ang namansahan nga dungog sa city council.
Ang termino nga ‘hook-up’ ang dunay seksuwal nga kahulugan hinungdan gikadismaya kini sa biktima batok sa maong opisyal.
Samtang gisitar ni City Councilor Atty Edgar Cabanlas kinsa nga nangulo sa giporma nga committee of the whole nga tapuson nila ang imbestigasyon sulod sa duha ka semana.
Kini human siya tahasi sa mayoriya nga dunggon ang panig sa nag-reklamo nga si alyas Ivy batok Seno ning syudad.
Gibutyag ni Cabanlas nga ipatawag nila ang duha ka kampo aron mapaspasan ang imbestigasyon ug kalikayan nga tulisukon sa katawhan kay nagpasagad sa maong isyu.
Samtang nagpadumdomn si City Councilor Jocelyn Rodriguez sa iyang kaubang mga opisyales nga presyuron ang biktima ug pamilya aron mapugos pagsibog sa ipasaka nga kaso batok kang Seno.
Kini human nakita ni Rodriguez kon unsa ang posibleng dala nga impluwensiya sa giakasuhan nga ex-officio member sa konseho itandi sa nagpatabang nga biktima.
Miingon ang konsehal nga dako siya nga supak sa bisan unsa nga porma sa pag-abuso batok sa kababayen-an sa dakbayan.
Una niini,daw nangbasol si Seno kon nganong nahulog nga ‘trial by publicity’ ang gidangatan niini batok sa ‘hook-up’ allegation gikan sa babaye nga wala niya sukad makit-i sa personal.
Kini human sobra semana na nga gituki sa local media ang pasangil nga gibato batok kaniya.
Namugos si Seno nga ‘private crime’ lang daw ang nahitabo apan sa iyang pag-atubang sa ilang regular session siya namugos nga dili tinood ang pasangil sa maong babaye.
Samtang,mi-depensa usab si alyas Ivy nga nangayo siya’g panahon aron magkita sila ni Seno aron husayon ang hitabo apan wala kini motunga sa city hall.
Kini ang hinungdan nga midangop siya sa PNP ug mikuha’g pribadong abogado aron kasuhan si Seno.
