CAGAYAN DE ORO CITY – Giangkon ni Committee on Civil Service and Professional Regulation chairman ug Iligan City Lone District Rep.Frederick Siao nga dakong hagit sa iyang komitiba ang hangyo ni Pres Rodrigo Duterte nga amendaran ang Continuing Professional Development o CPD law.
Miingon si Siao nga daghang reklamo ang ilang nadawatan gumikan sa maong balaod.
Dugtong niini, gipasalig sa magbabalaod kang Duterte nga ilang i-prayoridad ang pag-amendar sa maong balaod aron makita kon unsa ang mga kakulangon niini.
Isugyot niini sa kaubang magbabalaod nga suspensuhon ang CPD training sulod sa tulo hangtud lima ka tuig.
Una nang gitawag ni Duterte nga dili realistic ug gadugang lamang sa problema ang pipila ka mga gabayan sa CPD law.
Samtang naagtoo si Bukidnon 4th District Cong Rogelio Niel Roque nga duol na nga makabaton sa bakuna ang nasud batok sa coronavirus disease.
Kini ang rason kon nganong wala kaayo nagpokus si Pres Rodrigo Duterte sa solusyon sa problema sa Covid-19 atol sa iyang ika-lima nga State of the Nation Address kagahapong adlawa sa kauluhan.
Gibutyag ni Roque nga dako ang iyang pagtoo nga may kasayuran si Duterte sa update sa bakuna isip presidente sa nasud.
Gani, gibutyag sa kongresista nga kabahin siya nga nalipay ug Iligan City Lone District Rep.Frederick Siao sa performance ni Duterte taliwala nga daghang mga balaod ang gipa-amendar kanila atol sa SONA.
