Gisugyot ni Konsehal Roger Abaday ang pagpahigayon og malukpanong pagtuon alang sa pagtukod og dugang off-street o satellite transport terminal sa Siyudad sa Cagayan de Oro.
Sumala pa sa nangulo sa komite sa public order and safety sa 21st City Council nga si Abaday, kinahanglan nga mosabay sa paspas nga pagtubo sa siyudad ang sistema sa pampublikong transportasyon tungod kay sa pagkakaron nagsalig lang kini sa Agora, Bulua, ug Eastbound Integrated Bus Terminals.
Gipasabot usab niya nga nakita ang dakong pagtubo sa mga pinuy-anan ug komersyal nga kalambuan sa mga uptown nga bahin sama sa Canitoan, Pagatpat, ug Lumbia.
Tungod niini, gihangyo ni Abaday nga i-refer ang maong butang ngadto sa Committee on Public Utilities ug sa Committee on Planning and Development aron sutaon ang maong panginahanglan.
