Gipasiugda sa City Anti-Drug Abuse Council o CADAC ang pagpalambo sa mga pamaagi sa pag-atiman sa problema sa ilegal nga droga sa syudad, diin giila nga dili tanan solusyon nagtapos sa pagpangdakop ug pagprapriso.
Sumala ni Konsehal Roger Abaday, Vice Chairman sa CADAC, gawas sa hugot nga pagpatuman sa balaod batok sa mga tigpayuhot ug tig-apod-apod sa droga, klaro usab nga nakalatid sa balaod ang obligasyon sa lokal nga panggamhanan sa pagtukod sa Balay Silangan o mga rehabilitation center alang sa mga indibidwal nga naadik sa ginadiling droga.
Matud pa ni Abaday, anaa na karon ang maong pasilidad sa Upper Puerto ug kini usa sa mga prayoridad nga gihingusgan sa CADAC karong tuiga, ilabina ang pag-renovate ug pagpaayo sa maong rehabilitation center aron mas epektibo ang serbisyo niini.
Gipasiugda usab sa konsehal ang dakong panginahanglan nga mahatagan og hustong medikal nga atensyon ug rehabilitasyon ang mga drug dependents, labi na kadtong boluntaryong mitahan sa ilang kaugalingon sa awtoridad ug tinuoray nga andam nga mibiya sa bisyo ug magsugod pag-usab. (Jamed Oliver)
