Giduso sa konseho pinaagi ni Majority Floor Leader Edgar Cabanlas ang resolusyon nga i-relib sa pwesto ang station commander sa Police Station 2 (Cogon) human sa nahitabong traffic accident nga naglambigit sa 9-anyos nga batang biktima nga namatay atol sa insidente.
Butyag ni Cabanlas atol sa ika-34 nga regular nga meeting sa konseho nga dili angay itolerate ang maong hitabo diin napakyas ang kapulisan sa pagmentinar sa seguridad.
Para kaniya, dili maayo nga napakyas ang mga police sa Cogon Police Station sa maong insidente nga nahitabo duol ra sa ilang estasyon.
Tungod niini, nakasaway si Cabanlas sa kahuyang sa kapasidad sa estasyon sa pagpatuman sa balaod. Giingon niya nga nagkinahanglan ang syudad og mga police nga maisogon sa pagtuman sa balaod ug dili mga talawan.
Iyang gipasiugda nga dili pwede nga chief of police nga luyahon ang ibutang sa Cogon tungod kay usa kini sa pinakabusy nga lugar sa syudad.
Busa, ang konseho mihangyo sa City Director sa Cagayan de Oro City Police Office (COCPO), si Police Colonel Dexter Gabor Paje, nga tangtangon sa pwesto ang commander sa PS2 Cogon ug ibutang na lamang sa dili kaayo gubot nga lugar.
Gisuportahan usab ni City Councilor Girlie Balaba ug Councilor Aga Usan ang sugyot nga resolusyon ni Cabanlas.
Samtang gihangyo nila ang Komite sa Public Safety nga madungog usab ang bahin sa station commander sa PS2 Cogon kalabot sa nahitabong aksidente.
