CAGAYAN DE ORO CITY-Miani sa dugang suporta sa konseho nga ipaubos sa imbestigasyon ang Cagayan de Oro Water District o COWD.
Kini human masayri nga giwad’ag gahom ang konseho nga masusi ang gisudlan sa COWD nga kontrata tali sa Metro Pacific Water Investments aron mo-suplay tubig sa syudad.
Miingon si City Council Majority Floor Leader Kag Ian Mark Nacaya nga nainsulto sila sa paglipat sa COWD kanila.
Kini ang hinungan nga mihimo’g dugang pakisusi si Nacaya ug nadiskobre nga duha ka hugna sa kontrata ang gipirmahan sa COWD ug MetroPac.
Nasayran nga ubos sa joint venture contract,e-take over sa MetroPac ang Rio Verde aron mag-inusarang mag-suplay sa panubig sa syudad.
Samtang naka-dayeg si Kag Bong Lao,chairman sa public utilities sa konseho sa gihimong pakisusi ni Nacaya sa kontrobersyal nga kontrata sa COWD ug MetroPac.
Kini human susama ang ilang nakita sa gihimo sa COWD nga daw wala pagtahod sa konseho pinaagi sa wala pagpangayo’g pagtugot aron mosulod sa bag-ong bulk water contract.
Nanghinaut si Lao nga molugwa na ang mga hukom sa giduso nila nga intervention sa korte ug petition for review sa Philippine Competetive Council aron hingpit matun-a’g balik ang COWD-MetroPac contracts.
