Gipamugos sa pundok sa Konsumanteng Kagay-anon Inc. nga kinahanglan na ang pag-upgrade ug pag-improve sa linya sa kuryente sa CEPALCO aron masulbad ang dakong problema sa system loss sa dakbayan sa Cagayan de Oro, matod pa sa Presidente sa maong grupo nga si Marlon G. Libot.
Sa iyang interbyu sa Bombo Radyo, siya miingon nga bisan og makatabang ang direktiba ni Presidente Bongbong Marcos nga pagkuha sa 5 ka porsyento sa system loss nga makatipig og 250 pesos sa 5,000 ka pesos nga bill sa kuryente, dili gihapon kini ang kinatibuk-ang solusyon alang sa mga konsumante.
Tungod niini, nagtuo ang ilang grupo nga mas importanteng giyahan ang distribution utility nga i-upgrade ang ilang mga edaran na kaayo nga kagamitan aron dili na maapektuhan ang kalidad sa serbisyo.
Aron mahulog ug momenos ang bayronon, gihangyo usab sa lider sa konsumante nga pahugtan ang pag-monitor batok sa mga illegal connections ug kadtong gitawag nga mga pilferage o metro nga magic-magic aron maprotektahan ang interes sa publiko.
