Giangkon ni Lawrence Lubiano, presidente sa Centerways Construction and Development Inc., nga siya personal nga nagdonar sa ₱30 milyon alang sa kampanya ni Senador Francis “Chiz” Escudero sa 2022 nga eleksyon, bisan pa nga ang iyang kompanya aktibong nakadaug sa daghang kontrata sa flood control projects sa gobyerno niadtong panahona.
Iya kining gipadayag sa House tri-committee hearing nga gipangulohan ni Rep. Chel Diokno sa Akbayan Party-list, diin gitutukan ang mga anomalya sa flood control projects.
Sa hearing, gitin-aw ni Lubiano nga ang donasyon gikan sa iyang personal nga bulsa, ug walay migamit sa salapi sa ilang kompanya.
Hisayran nga ang Centerways Construction nakadaug sa kapin sa ₱5.1 bilyon nga mga proyekto gikan sa 2022 hangtod 2024, ug kasagaran niini nahimutang sa Sorsogon, ang lugar kung asa nagpuyo si Escudero.
Gibutyag usab ni Lubiano nga duha sa iyang mga igsoon nanerbisyo isip mayor ug konsehal sa Sorsogon, nga nagpalig-on sa iyang politikal nga koneksyon sa lokal ug nasudnong lebel.
Ang Centerways Construction giila nga usa sa top 15 contractors nga nakadaug og flood control projects sa unang tunga sa administrasyon ni President Marcos.
Gipangutana ni Diokno kung ang maong donasyon nakalapas ba sa Omnibus Election Code, nga nagdili sa mga kontraktor sa gobyerno sa paghatag sa kontribusyon sa mga kandidato.
Si Escudero mitug-an nga iyang nadawat ang donasyon, apan gipasalig nga wala siya misulod sa mga kontrata sa kompanya ug wala siya milambigit sa procurement process.
