CAGAYAN DE ORO CITY-Ipatawag pagbalik sa Sangguniang Panlalawigan ang mga ahensiya aron manubag kon nganong nakasulod ang kapi’g 5-mil ka tonelada sa basura gikan sa South Korea diha sa lungsod sa Tagoloan,Misamis Oriental.
Kini human padayong gi-isnab ni Phivedic administrator Atty Franklin Quijano ug Bureau of Customs ang imbitasyon sa lalawigan aron mohatag katin-awan sa maong isyu.
Miingon si Vice Gov Joey Pelaez nga naalarma sila sa gisudlan nga negosyo sa Verde Soko Philippines Industrial Corporation diin sila nag-proseso sa imported waste materials nga walay mga papel.
Midunggo ang maong mga basura sa Mindanao International Container Terminal gikan South Korea sa Hunyo ning tuiga nga wala masayod ang kagamhanang lokal sa Tagoloan ning lalawigan.
Una usab niini,gipasabot sa Korean company manager Rosalinda Namata nga duna sila’y igong pagtugot sa Phivedic aron sila legal maka-operate sa ilang plastic processing plant.
