Posibleng mo-interbensyon ang Korte Suprema sa impeachment complaint batok kang Vice President Sara Duterte kon kuwestiyonon ang legalidad sa gihimong proseso sa Kamara, matod ni Atty. Jayvee Hinlo, VP PDP for Visayas.
Sa iyang interbyu sa Bombo Radyo, gitataw ni Hinlo nga bisan pa og nagpadayon na ang proseso sa House Committee on Justice ug posibleng musaka na sa plenaryo ug Senado ang kaso, dili kini makapugong sa Korte Suprema kon adunay paglapas sa Konstitusyon.
Iyang gilaraw nga mahimong kwestiyonon sa Korte Suprema ang paagi sa pagkuha og ebidensya sa Kamara, lakip na ang pag-abli sa bank accounts ug ubang personal nga rekord nga posibleng sayop ang pagproseso.
Dugang pa niya, ang desisyon sa Korte Suprema mahimong direktang makaapekto sa impeachment bisan pa nagpadayon ang botohan sa Senado.
Busa, alang kang Hinlo, aduna nay duha ka dagan sa proseso—ang legislative ug ang judicial—nga parehas nga mahimong magtino sa kahimtang sa kaso.
