CAGAYAN DE ORO CITY – Naka-kustodiya na sa Bureau of Immigration/BI-Manila ang Koryano nga unang nasignit sa hiniusang operasyon sa mga operatiba sa Police Regional Office 10 ug Criminal Investigation and Detection Group sa Brgy Igpit,Opol,Misamis Oriental.
Matud ni PRO 10 spokesperson Major Joann Navarro nga gidakop ang akusado nga si alyas Jang,53 anyos,minyo nga taga- South Korea ug nagpuyo sa Misamis Oriental tungod sa pasangil nga pagsupak sa articles 3 ug 11 sa Punishment of Tax Offenses Act sa ilang nasud.
Miingon si Navarro nga gamit ang aktibo nga International Police Red Notice, gidakop si Jang sa hiniusang operasyon sa CIDG Cagayan de Oro City Field Unit, Opol Municipal Police Station, Regional Intelligence Division 10 (RID-10), Regional Special Operations Unit 10 (RSOU-10), Korean National Police ug Bureau of Immigration – Fugitive Search Unit (FSU).
Gilayong gipaubos sa proseso ang Koryano sa CIDG 10 sulod sa Kampo Evangelista ning syudad ayha gibalhin sa BI sa kauluhan.
Dugtong niini, gikalipay ni PRO 10 Director Brig Gen Jaysen De Guzman ang maong kalampusan ug gisaluduhan ang operating units sa pagpatuman sa Interpol Red Notice batok sa Koryano.
Siya miingon nga ang pagkasikop sa Koryano ang pagmatood sa kalig-on sa inter-agency ug international coordination alayon sa pang-kalibutanong tinguha pagdala sa mga akusado sa husgado ug dili magsilbing taguanan sa mga kriminal ang Pilipinas.
