Misampot sa tensyon ang tinagdanay sa gobyerno sa Kingdom Saudi Arabia (KSA) ug United Arab Emirates (UAE), tungod sa isyu sa gubat sa Yemen ug Sudan. Subay sa report, gikastigo sa UAE ang KSA sa pagbomba sa Yemeni port city sa Mukalla.
Namahayag ang Saudi Military nga targetted ang ilang atake ug nagpunting kini sa mga armas nga gisuplay sa mga separatista nga konektado sa UAE.
Ang hitabo nagpakita sa tin-aw nga utlanan sa ilang relasyon isip suod nga alyadong nasud sa Arab Nation o sa Middle East. Wala pay reaksiyon si US Presidente Donald Trump nga kanunay nagpataliwala sa mga managbanging nasud.
Unang namahayag ang mga geopolitical analyst nga delikado kung musangpot sa gubat ang “cold war” sa UAE ug KSA kay sigurado nga magtinabangay ang mga kaalyado niining mga nasud lakip na ang mga terorista nga nagsuporta kanila.
