CAGAYAN DE ORO CITY – Gikasuhan sa nagpaila nga si Mr Julie sa cyber libel ug oral defamation si City Councilor Zaldy Ocon sa piskalya ning syudad.
Kini human unang nanghagit si Ocon sa iyang mga kaubang konsehal sa konseho nga isumbong siya korte aron iyagyag niya ang mga dokumento nga nagmatood nga api sa narco-politician list si Cagayan de Oro 1st District Rep Rolando ‘Klarex’ Uy sa dakbayan.
Gibutyag ni Atty Kenneth Tamala nga gihimo kini sa ilang kliyente tungod sa walay basehan nga akusasyon ni Ocon batok kang ‘Klarex’.
Miingon si Tamala nga gusto sa ilang kliyente nga matul-id ang mga bakak nga pasangil sa maong konsehal kontra Klarex nga kanunay niya ibalik-balik sa binayran niini nga programa sa radyo ug makita usab sa Facebook.
Samtang welcome devt alang sa kampo ni Uy nga dunay maisigong residente nga nagpakabana batok sa mga pasangil ni Ocon.
Miingon si Fred Dellava,media relations sa buhatan ni Uy nga katungod ni bisan kinsa nga makahimo niini partikular kon nakit-an nila nga naghinobra na ang walay basehan nga akusasyon ni Ocon.
Gibutyag ni Dellava nga bisan ang legal team ni Cong Klarex ang may lahi usab nga mga gitun-an nga lakang batok sa maong konsehal.
Samtang nanganti si Ocon nga dugang mga dokumento nga magyagyag sa mga baho sa pipila ka city election officials ang iyang ibulgar sa mga mosunod nga adlaw.
Kini bisan kon gitawag sa PDEA 10 nga inimbento lamang ang gihuptan ni Ocon nga nagduot kang ‘Klarex’ nga anaa sa listahan ni Pres Rodrigo Duterte nga nalambigit sa illegal drug trade sa dakbayan.
Gihimo ni Ocon ang panganti human kasuhi’g cyber libel ug oral defamation sa nagpailang Mr Julie sa piskalya sa syudad.
Una nang giklaro sa Bombo Radyo mismo ni Klarex nga wala siya sukad nalambigit sa pag-negosyo’g ilegal nga droga sukwahi sa gustong ipatoo ni Ocon sa katawhan sa dakbayan.
