CAGAYAN DE ORO CITY-Giangkon sa Overseas Workers and Welfare Administration (OWWA)-10 nga ang Kuwait maoy nag-una sa ilang listahan nga daghang ihap sa mga Pinay OFW’s ang gimaltrato sa ilang mga employers.
Matud ni OWWA-10 services and program chief Rhona Fahigal, nga daghang mga reklamo ang ilang gakadawatan sa mga Pinay domestic helper sa Middle East ug maoy pinakadaghan ang naggikan sa Kuwait.
Asoy pa niini nga usa sa mga rason kung nganong dugay nga makauli sa nasud ang mga gimaltrato nga OFW’s tungod sa Khafala system kon sponsorship system kun diin mangayo og clearance sa ilang employer ang mga OFWs.
Samtang giawhag ni Fahigal ang mga pamilya sa OFW’s nga nahabilin sa nasud nga dili magpasagad sa kahimtang sa ilang mga kapamilya nga nanginabuhi sa laing kanasuran.
Sya miingon nga kinahanglang modangop sa ilang ahensiya ang mga pamilya nga dugay na nga wala nila makontak aron ilang matabangan.
Gihangyo lang ni Fahigal ang pamilya sa mga OFW’s nga magbalik-balik sa ilang buhatan hangtud ilang makontak ang ilang kapamilya.
