CAGAYAN DE ORO CITY-Gitun-an sa legal team ni City Mayor Oscar Moreno ang pagduso’g kasong libelo batok sa kampo ni kanhi Dept of Agriculture Undersecretary Pompee La Vina.
Kini tungod sa daw malisyoso nga print advertisement diin nagtumbok kang Moreno nga nalambigit sa kurapsyon sa pagdumala sa syudad.
Miingon si Moreno nga sa iyang personal,dili niya kinaiya nga motompang sa istilo ni La Vinia apan mismo usab ang legal team niini ang nangusog nga angay hataga’g leksyon ang utok sa maong paid political advertisement.
Partikular nga gitumbok ni Moreno ang mga tawo nga gisugo ni La Vinia nga hayan kasuhan aron maghatag leksyon nga wala na’y tawo nga mabuhatan sa susamang pagpangdaot sa katungdanan.
Samtang mosamot pagdako ang suliran ni Moreno kon ihinayon nila ang pagduso’g kaso batok sa kampo ni La Vina.
Kini ang tubag ni La Vinia diin nanganti nga malugwa ang tanang dokumento kabahin sa mga transaction ni Moreno may kalabutan sa pagdumala sa syudad.
Miingon si La Vinia nga wala siya mahadlok sa bahad ni Moreno ug andam kini pag-atubang kon dunay kaso nga ipasaka sa husgado batok kaniya.
