Nawad‑an na sa tinuod nga diwa ang Labor Day tungod sa impluwensiya sa mga oligarko sa paghulma sa mga polisiya sa gobyerno, sumala sa Federation of Free Workers (FFW).
Sumala ni Atty. Proculo Sarmen, legal counsel sa FFW, dako na kaayo og kalahi‑an ang pagsaulog sa Labor Day karon kumpara kaniadto, diin mas klaro pa ang paghatag og bili sa mga trabahante ug sa ilang mga katungod.
Giingon niya nga sa kasamtangan, nagkahuyang ang diwa sa social justice nga unta mao’y sentro sa maong selebrasyon.Dugang pa niya, makita sa pipila ka polisiya ug desisyon sa gobyerno nga mas gibug‑atan ang interes sa mga dagkong negosyante kaysa sa kahimtang sa mga mamumuo.
Para ni Sarmen, usa kini sa mga bug‑at nga hagit sa nasod nga dapat mabalik ang tinuod nga diwa sa Labor Day ug mapalig‑on pag‑usab ang proteksyon ug hustisya alang sa mga trabahante.
