(Update) CAGAYAN DE ORO CITY – Gihupay ni kanhi Misamis Oriental Provincial Administrator John Venice Ladaga ang kabalaka sa katawhan kabahin sa pagduda nga aduna sila’y mga kahiwian nga tuyo taguan sulod sa kapitolyo-probinsyal.
Kini human mikaylap ang pagduda kung nganong gipanglubong ang maong mga dokumento sa espasyo nga sulod sa pasilidad sa bag-ong Misamis Oriental Provincial Jail sa lungsod sa Initao ning lalawigan sa miaging semana.
Gibutyag ni Ladaga nga sukwahi sa gipakatag nga dis-impormasyon sa social media, dili mga dokumentong pinansyal apan kabahin sa mga personal record sa mga empleyado sa kapitolyo nga dugay nang giplanuhan igawas sa kapitolyo kay aduna’y pagtugot sa balaod.
Siya miingon nga hukom kadto sa Human Resource Management Office nga mahipos distansya sa kapitolyo-probinsyal rason nahukmang ipanglubong na lang kaysa sunugon nga dako nang gidili gumikan sa Philippine Clear Air Act.
Nagkahulugan nga walay kalabutan si kanhi Misamis Oriental Gov. Peter Unabia sa pagpalubong kay tulo lang ka tawo ang nasayod nga naglakop sa HRMO,MOPJ ug sa laing pa nga opisina sa kapitolyo nga walay nagtangag nga dili maayong motibo.
Gipasalig ni Ladaga nga bukas ang ilang mga panahon kung gikinahanglan sa imbestigasyon nga gimando ni Misamis Oriental Gov. Juliette Uy aron mahatagan sa mas lamdag nga hitsura ang maong init nga isyu.
Apan giklaro usab niini nga kung makit-an nila nga padulong sa ilang ika-alaot ang ipaabot nila nga kooperasyon ngadto sa bag-ong administrasyon,dili sila motugot niini.
Hisayrang una nang namahayag si Atty. Angel Lim,bag-ong provincial legal officer nga nakaabot na kang Uy ang maong hitabo ug gitahas ang subsob nga imbestigasyon aron maklaro ang tanang aspeto sa isyu.
