CAGAYAN DE ORO CITY – Giklaro ni House Justice Committee vice chairman ug Misamis Oriental 1st District Representative Karen Lagbas nga wala daw sila sugu-a aron itaral sa impeachment proceedings si Vice President Sara Duterte.
Kini ang tubag ni Lagbas batok sa mga pagduda sa katawhan ilabina sa mga pundok nga political supporters sa mga Duterte nga nagtoo nga kamanduan ni kanhi House Speaker Martin Romualdez ug Pres Bongbong Marcos aron ipalagpot sa puwesto si VP Sara.
Miingon ang kongresista nga giaksyonan lamang nila ang mga nangabot nga reklamo batok sa bise-presidente rason nga gitahasan ang komitiba aron paminawon ang mga panig nga nalambigit sa maong isyu.
Gihimo ni Lagbas ang katin-awan nunot sa gitakdang pagsugod-pormal sa hearing proper sa duha ka impeachment cases batok VP Sara diin ipaubos sa makuting pagsusi ang gikuptang mga dokumento.
Dumduman nga duha sa upat ka impeachment complaints batok VP Sara ang gitratar sa komitiba nga adunay lig-ong basehan aron dunggon sa hingpit aron ma-establisar ang ‘probable cause’ nga basehan nga ihikyat sa plenaryo sa umaabot nga panahon.
Hisayrang namugos ang kampo ni VP Sara nga walay mga basehan ug pulos pagpanagat lamang ang gihimo sa administrasyon aron pugngan ang iyang kandidatura sa 2028 presidential elections.
