CAGAYAN DE ORO CITY – Mosugod na sa pagdumalang-pribado ang Aboitiz Infra Capital sa tanang mga kalihukan sulod sa Laguindingan Airport sa Misamis Oriental sa hinapos nga bahin sa Abril ning tuiga.
Kini subay sa pirmadong kontrata sa Public-Private Partnership o PPP tali sa gobierno ug maong kompanya didto sa Malakanyang.
Miingon si Franz de la Fuente, manager sa corporate communication and branding sa kompanya nga apil sa tahas nila ang pagpaluag sa passenger facility aron modako ang espasyo ug daghan ang mga pasahero nga maakomodar sa matag-lupad sa mga eroplano.
Siya miingon nga subay sa nauyunan nga PPP,molungtad ang ilang pagdumala sa tugpahanan sa lalawigan sa 35 ka tuig.
Dugang ni De la Fuente nga sa unang hugna sa pagpalambo sa tugpahanan,kini motala sa dul-an 4 milyones ka pasahero matag-tuig ug anaa usab sa 6.3 milyon pag-abot sa phase 2.
Hisayrang nahataga’g katumanan ni Pres Bongbong Marcos ang airport upgrade ug expansion nunot sa walay hunong nga pag-lobby ni Misamis Oriental 2nd District Cong. Bambi Emano kauban ang ubang mga kongresista sa Northern Mindanao.
