CAGAYAN DE ORO CITY – Gipangita karon sa kapolisan ug mga operatiba sa Philippine Drug Enforcement Agency o PDEA ang tulo ka sakop sa grupo sa dagkong sindikato sa ilegal nga droga sa Bangsamoro Autonomous Region in Muslim Mindanao o BARMM.
Namahayag si Lanao del Sur Provincial Police Office Director Police Col. Madzghani Mukaraam nga nakasibat sa operasyon ang tulo nga maoy target sa operasyon.
Kini naglakip usab sa mga dinakpan nga sila si Darangji Ombo Angatong ug Lendi Asiw Mangondacan kinsa nakuhaan sa kapin kilo nga shabu nga nagbalor 6.8 milyon pesos sa Brgy Eastern Wao,Lanao del Sur.
Si Mukaraam miingon nga ka-upat na kahigayon nga ilang gi-operasyonan ang maong grupo ug niadtong miaging adlaw lamang nila kini nasapon.
Asoy pa niini nga maoy ilang target karon nga masikop ang mga utok sa sindikato kinsa pulos nakasibat sa drug buy bust operation.
Una nang miggawas ang report nga sakop sa Maute-ISIS ang duha ka suspek nga nadakpan sa mga operatiba.
