CAGAYAN DE ORO CITY – Sa ospital na magpasko ang walo ka mga empleyado sa Superior Motor-Corp, Bayugan City branch human malambigit sa linoog nga bangga sa dalan sa Purok 1, Barangay Lunotan, Gingoog City, kagahapon sa hapon.
Base sa report, nagbanaw ang dugo sa mga pasahero sa multicab human kini giligsan sa naghaguros nga forward truck nga gimaneho ni Mark Kevin Dagoc, 30 anyos residente sa Brgy. Camaman-an ning syudad.
Gibutyag ni Police Lt. Col Ariel Philip Pontillas nga nadaut ang brake sa multicab hinungdan nga hinay ang padagan sa driver niini nga si Luzvimindo Cagula Cebreros, 32 anyos, residente sa Bayugan City.
Wala damha sa mga empleyado nga dasmagan sila sa forward truck.
Dead on spot ang usa sa pasahero sa multicab nga si Berto Tantiado.
Dili na mahitsura ang multicab tungod sa grabeng impact.
Nalabog ang walo ka mga pasahero ug nagkatag ang ilang lawas sa dalan.
Lakip sa mga kritikal nga pasahero sila Carlito Cagadas Rollon, Perlo Tadifa Secofe, Eduardo Dulor, Ryan Labos, Marian Antonio, Glenn Velasquez, Aron Luison ug ang ilang driver nga si Cebreros.
Gikustodiya na sa Gingog CPS ang driver sa forward truck.
