CAGAYAN DE ORO CITY – Patay na nga na-rekober sa mga personahe sa Gingoog City Fire Station Emergency Medical Services and Operations ang 27 anyos nga lalaki nga nanguha’g dugos sa mga putyukan ibabaw sa kahoy sa Brgy Binakalan,Gingoog City,Misamis Oriental.
Kini human unang nagpatabang ang pamilya sa biktima nga si Efren Oaminal nga mapanaug gikan sa ibabaw sa kahoy.
Miingon si BFP Gingoog City investigator FO1 Anthony Ranan nga nagkuyog ang biktima ug ang igsoon niini nga lalaki sa pagpanguha’g dugos sa maong lugar.
Apan giingong nawad-an sa kusog ang biktima samtang atua pa ibabaw sa kahoy kay wala mokaon daan rason nga naglisod pagkanaug ug gipangpaak na usab sa natandog nga mga putyukan.
Kini ang rason nga patay nang narespondehan sa rescue team gikan sa gatos ka tiil mga kahabog sa kahoy nga gisakaan niini.
Hisayrang gidala pa sa ospital ang biktima apan wala na kini maluwas pa sa mga doktor nga nag-atiman niini.
