CAGAYAN DE ORO CITY – Blangko pa ang kapolisan sa pagsuta sa hinungdan sa kamatayon sa usa ka lalake diha sa Seaside,
Kolambog,Brgy Lapasan ning syudad. Patay nang nakita sulod sa iyang lawak ang biktima nga si Ronelio Enanuria, 45-anyos ug residente sa maong dapit. Matud ni P03 Emmanuel Jalog, imbestigador sa Agora Police Station nga ilang giimbestigaran karon ang report nga gikulata sa usa ka alyas “Pering” ang biktima sa wala pa kini mamatay.
Nakaangkon ang biktima sa samad sa iyang too nga kilay ug nagkadugo ang iyang nawong sa dihang nakita kini sa mga pulis.
Gisugyot ni Jalog nga ipaubos sa otopsiya ang patay’ng lawas sa biktima aron masuta ang hinungdan sa kamatayon niini.Giangkon ni Isagani Salise nga gikulata ni Pering ang namatay niyang ig-agaw nga si Ronelio Enanuria.
Apan gitin-aw ni Salise nga dili siya segurado kon namatay sa kulata ang biktima.
Sumala ni Salise nga kauban silang tulo sa inom sa iyang ig-agaw ingon man ni alyas Pering niadtong bisperas sa pagsugat sa bag-ong tuig.
Nakita niya nga nakuyapan si Enanuria human gikulata ni alyas Pering.
