CAGAYAN DE ORO CITY-Detinado ang 25 anyos nga babaye nga suspek pagdunggab-patay sa iyang kaipong lalaki diha sa Brgy Baluarte,Tagoloan,Misamis Oriental.
Giila ang biktima nga si Renz Carl Manrubang,30 anyos samtang ang suspek mao si Daisy Rael Lumayno nga pulos nagpuyo sa maong lugar.
Sumala ni Tagoloan Police Station commander C/Insp Albart Tare nga gipugngan ni Lumayno molakaw si Manrubang tungod sa kahubog apan nag-resulta kini sa pagpangulata.
Kini ang hinungdan nga mikuha’g kutsilyo ang suspek aron i-depensa sa kaugalingon sanglit kanunay usab siya dagmalan sa biktima.
Namugos si Lumayno nga dili niya tinguha nga dunggabon ang biktima apan nawad-an kini’g kontrol sa kaugalingon kay gisagpa ug sumbag siya niini.
Kini ang hinungdan nga detinado ang suspek ug hayan kasuhan sa kasong pagpatay sa piskalya.
